Það er stundum sagt að stjórnmál séu list hins mögulega. Í raun er það ágætis frasi.
En möguleikarnir á að Katrínu Jakobsdóttur takist að mynda fimm flokka ríkisstjórn virðast fara minnkandi. Efasemdir skína í gegn um orð flokksforingja í dag. Það er býsna langt á milli sumra af þessum flokkum og það þarf að gera málamiðlanir sem erfitt gæti verið að verja fyrir stuðningsmönnum.
Að sumu leyti virðast það vera Píratarnir sem eru tilbúnir að ganga lengst í málamiðlunum.
En hvaða möguleikar eru í stöðunni ef Katrínu mistekst? Hún gæti reynt að kalla Framsóknarflokkinn að borðinu í stað Viðreisnar – eins og áður hefur verið nefnt á VG í raun meiri samleið með Framsókn en Viðreisn í mörgum málum. Þar setur strik í reikningin að Björt framtíð og Viðreisn hafa bundist fastmælum um að hanga saman – hversu lengi sem það heldur.
Hún gæti reynt að tala við Sjálfstæðisflokkinn, en slíkt er ekki vinsælt í herbúðum VG – þar virðist stemmingin fremur vera sú að flokkurinn eigi heldur að vera utan stjórnar en starfa með íhaldinu.
Hver væri þá næstur til að fá stjórnarmyndunarumboðið? Píratar eru þriðji stærsti flokkurinn en möguleikar þeirra um að hafa forystu fyrir stjórnarmyndun eru sjálfsagt ekki miklir. Líklegra er að það verði Viðreisn, og þá í samflotinu með Bjartri framtíð.
En það er satt að segja ekki sennilegt að Benedikt Jóhannessyni tækist þar sem Bjarni Benediktssyni mistókst og Katrínu Jakobsdóttur hugsanlega líka – og alveg spurning hvar hann myndi taka upp þráðinn? Með Sjálfstæðisflokki og sjálfan sig í hlutverki forsætisráðherra? Aftur með flokkunum fjórum? Myndi þá eitthvað hafa breyst?
List hins mögulega? Já, en til þess verða flokkar að vera reiðubúnir að gefa eftir. Annars blasir við stjórnarkreppa og væntanlega nýjar kosningar. Hverjir færu best út úr slíkri atburðarás? Ekki er ólíklegt að það verði ríkjandi stjórnvöld.