Sjálfstæðisflokkurinn sækir í sig veðrið nú þegar einn og hálfur sólarhringur er til kosninga, Ríkisstjórnin er kolfallin en Sjálfstæðisflokkurinn styrkir stöðu sína. Er hugsanlega að ná því fylgi miðað við aðra flokka að Guðni forseti getur ekki annað en afhent Bjarna Benediktssyni stjórnarmyndunarumboðið fyrstum.
Tekið skal fram að þetta miðar við skoðanakönnun sem birtist á Stöð 2 í kvöld.
Sjálfstæðisflokkurinn hefur rekið ansi kröftuga kosningabaráttu síðustu dagana og það er kannski ekki óeðlilegt að kjósendur halli sér status quo á síðasta spölinum. Það er þekkt.
Og svo er það þetta, þessi frétt, þessi mynd eftir Golla sem gæti jafnvel orðið táknmynd kosninganna. Leiðtogar stjórnarandstöðuflokkanna sem vilja mynda ríkisstjórn koma saman út úr húsi í Bakarabrekku.
Þau eru eins og fólk sem kemur héðan og þaðan, hittist eiginlega af tilviljun á kaffihúsi, veit ekki hvert það er að fara næst. Vekur ekki sérstakt traust – í kosningabaráttu sem snýst mjög mikið um traust. Líkurnar á að vinstri stjórnin eða „umbótastjórnin“ sem þau var að ræða líti dagsins ljós eru ekki sérlega miklar. Náist meirihluti verður hann örþunnur.
Eða hvaða áhrif er þetta að hafa, sérstaklega á hina óráðnu? Líklega kemur þetta best út fyrir VG, enda er Katrín Jakobsdóttir sposk á svipinn. Hjá þeim er ótvíræð uppsveifla. Hin eru mjög óviss á svipinn.