Kosningabaráttan er farin að snúast mjög mikið um hvernig mynda eigi ríkisstjórn, hreyfingar á fylgi og hver vill vera með hverjum. Það verður að segjast eins og er að málefnin eru farin að falla dálítið í skuggann. Hinir svokölluðu stjórnmálaskýrendur eru dálítið slæmir með þetta – og ég sjálfsagt ekki barnanna bestur. Við höngum alltof mikið í skoðanakönnunum.
Á sinn hátt er þetta dálítið andlaust – og það verður að segjast eins og er að kosningabaráttan hefur mestanpart verið skelfing andlaus, maður hefði búist við meiri tilþrifum á tíma þegar blasa við stjórnarskipti og mesta fylgisleysi fjórflokksins fyrr og síðar. Það blása nýir vindar en þeir virka ekkert sérlega hvassir.
Það er á sinn hátt hressandi að sjá að Viðreisn heldur blaðamannafund beinlínis til að árétta málefnastöðuna, hann þarf sumpart að gera þetta til að brjótast út úr herkví umræðunnar um stjórnarmyndanir – og kannski kemst flokkurinn einmitt að kjarna málsins þegar hann segir brýnasta málið sé einfaldlega lífskjörin hérna:
Helsta vandamál íslensks samfélags er að lífskjör hér eru ekki samkeppnishæf við það sem býðst í nágrannalöndunum. Það er meginástæða þess að brottfluttir íslendingar umfram aðflutta eru 6000 frá 2010. Á sama tíma eru glögg merki þess að landið glími við spekileka.
Og þetta:
Kostnaðurinn af því að vera Íslendingur er of hár. Ein meginorsök þess eru háir vextir sem eru afleiðing af sveiflukenndu hagkerfi og óstöðugum gjaldmiðli. Íbúðakaupandi á Íslandi má væntast þess að greiða tvisvar – þrisvar sinnum fyrir eign sína í formi vaxta, á meðan íbúðakaupandi á Norðurlöndum greiðir einu sinni fyrir sína.
Viðreisn leggur meðal annars til myntráð til að lækka vexti, skattkerfisbreytingar, aukna innheimtu auðlindagjalda, en um leið meiri útgjöld til uppbyggingar heilbrigðisþjónustu, menntakerfis og innviða – og minni skerðingar í almannatryggingakerfinu.
Getur hugsast að þetta séu málin sem við ættum að vera að tala um fyrst og fremst nú þegar einungis fimm dagar eru til kosninga, en aðeins minna um það hverjir eru með hvaða fylgi?
