Í kosningabaráttu sem er ekki beint að kveikja elda í hugum kjósenda og þar sem mikið ber á neikvæðum áróðri stendur þessi auglýsing upp úr. Ragnar Kjartansson, myndlistarstórstjarna sem skipar 9. sætið á lista VG í Reykjavík norður, græðir og grillar á sinn hátt.
Hér er annað sem gæti virkað vel, Píratar skutla á kjörstað. Langmest fylgi Pírata er meðal yngra fólks sem skilar sér illa í kosningum. Í skoðanakönnun Félagsvísindastofnunar frá því í gærmorgun er fylgið 39 prósent meðal fólks sem er 18-29 ára. Þetta gæti verið svo stór breyta að það lækki fylgi Pírata um nokkur prósentustig. Eldra fólk, sem t.d. styður Sjálfstæðisflokkinn í miklu meira mæli, lætur sig ekki vanta, passar sig að mæta tímanlega á kjördag.
Ríkisstjórnin undir forystu Pírata og VG sem virtist vera í kortunum í skoðanakönnun í gærmorgun kann að reynast tálsýn. Píratar þurfa altént að hafa fyrir því að ná í atkvæðin. En það er kannski ekki nóg að vera bara á ferðinni frá 10 til 14?