Yfir núverandi og fyrrverandi Sjálfstæðismenn, þá sem eru enn trúir og þá sem eru farnir annað eða eru að íhuga það, dynur nú áróður um að atkvæði greitt Viðreisn sé ávísun á vinstri stjórn. Þetta er línan sem hefur verði gefin í Valhöll og henni verður haldið fram á kjördag.
Úr hinni áttinni heyrist svo að Viðreisn muni hlaupa í eina sæng með Sjálfstæðisflokknum ef hún fær tækifæri til. Þetta endurómar mjög kröftulega hjá Össuri Skarphéðinssyni sem vill reyna að forða því að fólk sem hefur kosið Samfylkinguna hallist í átt til Viðreisnar. Össur segir að Viðreisn og Björt framtíð vilji verða „aukahjól fallinnar ríkisstjórnar“.
Það er semsagt verið að setja undir leka til Viðreisnar bæði vinstra og hægra megin.
Fyrir Viðreisn er þetta dálítið erfitt. Hvernig getur flokkurinn svarað þessu? Viðreisn á erfitt með að kveða fast upp úr um með hverjum flokkurinn vill vinna, eðlilegast fyrir hann væri ef einhvers konar miðjustjórn væri í boði, en slíkt er ólíklegt. Um stöðu miðjunnar fabúlerar Þorsteinn Pálsson í grein á vef Hringbrautar. Hann leggur til að Viðreisn og Björt framtíð standi saman í umræðum um myndun ríkisstjórnar og geti þannig orðið „kjölfestan“ í nýrri ríkisstjórn.
Það má reyndar rifja upp að nafn flokksins, Viðreisn, vísar beinlínis í ríkisstjórn Sjálfstæðisflokks og Alþýðuflokks sem sat á árunum 1959 til 1971.
Samt er það svo að í þessu efni sannast gamla máltækið – sá á kvölina sem á völina. Það á við um Viðreisn þessa dagana.
Þorsteinn Pálsson vill að Viðreisn og Björt framtíð standi saman á miðjunni.