Það verður að segjast eins og er að viðsnúningur Framsóknarflokksins í spítalamálum er allstór í sögulegu samhengi. Stefnan sem nú er rekin í heilbrigðiskerfinu mótaðist að miklu leyti í tíð heilbrigðisráðherra Framsóknarflokksins. Flokkurinn fór með ráðuneytið í tólf ár samfellt, frá 1995 til 2007, og þá voru ráðherrar Ingibjörg Pálmadóttir, Jón Kristjánsson og Siv Friðleifsdóttir.
Stefna sem gengur út á mikla miðstýringu í heilbrigðiskerfinu á rót að rekja til þessa tíma og einnig áformin um að byggja stórt sjúkrahús á lóð Landspítalans – hátæknisjúkrahúsið eins og það var kallað frama af.
Lengi var framsóknarmaðurinn Alfreð Þorsteinsson formaður framkvæmdanefndar nýja spítalans, eins og sjá má á þessari auglýsingu.
En nú hefur Framsókn skipt um kúrs og telur spítalabygginguna við Hringbraut hið mesta óráð. Lilja Alfreðsdóttir, dóttir Alfreðs Þorsteinssonar, fer þar framarlega í flokki og skrifar á Facebook síðu sína:
Við viljum byggja nýtt og nútímalegt þjóðarsjúkrahús frá grunni á góðum og aðgengilegum stað, en ekki þröngva ótal byggingum inn í rótgróið íbúðahverfi þar sem framkvæmdir tækju lengri tíma með gríðarlegu ónæði fyrir sjúklinga, starfsfólk og íbúa. Við viljum byggja til framtíðar á svæði sem leyfir meiri byggingarhraða, þar sem hægt er að vinna dag og nótt og staðarval byggist á faglegum forsendum en ekki pólitískum og úreltum. Við viljum forða sjúklingum og aðstandendum frá umferðateppum og þrengslum miðborgarinnar en bjóða í staðinn nálægð við náttúruna sem styður við markmið um bætta heilsu fyrir líkama og sál. Ég trúi því að okkar leið sé allt í senn; betri, skilvirkari og hagkvæmari og að nýtt þjóðarsjúkrahús kæmist fyrr í gagnið en ella.
Lilja birtir líka þessar myndir af spítala sem danska arkitektafyrirtækið C.P. Möller hannaði. Eiga væntanlega að sýna hvernig íslenskur spítali á öðrum stað en við Hringbraut gæti litið út. Verður reyndar að segjast eins og er að þessi hús eru allmikið fallegri en teikningar sem hafa sést af Hringbrautarsjúkrahúsinu.