Væntanlega er seinna í mánuðinum bók eftir ljósmyndarann Ragnar Axelsson, Rax. Bókin er stórkoslegt listaverk – en hún hefur líka gríðarlega þýðingu fyrir samtíma okkar. Rax hefur sérhæft sig í að taka myndir á norðurslóðum, bókin skiptist í þrjá kafla, myndir frá Íslandi, Færeyjum og Grænlandi.
Rax hefur farið víðar um norðrið en flestir menn. Hann hefur ekki tölu á skiptunum sem hann hefur komið til Grænlands. Þar hefur hann farið í litlar byggðir veiðimanna sem margar hverjar eru að leggjast af. Meðfram þessu hefur hann skrásett þær gríðarlegu breytingar sem eru að verða vegna hlýnandi loftslags. Hann sýnir okkur heim sem er að hverfa og aðsteðjandi vá.
Nú er hann farinn að leita á aðrar slóðir til að skrá þessi miklu umskipti, hann ferðast um Síberíu eins og mátt sjá af aukablaði sem kom út með Morgunblaðinu í tilefni af Arctic Circle ráðstefnunni. Þar er jörð sem áður var slétt orðin ójöfn, holur myndast þar sem streymir upp gas – sífrerinn er að þiðna.
Við fjöllum um Rax og nýju bókina hans í Kiljunni í kvöld.
Ein af myndum Rax úr bókinni sem við fjöllum um í Kiljunni. „Stóri ísinn er veikur“, sagði gamall veiðimaður á Grænlandi við hann.