Ef Viðskiptaráð hefði verið til á síðustu öld, hefði það þá goldið varhug við almannatryggingum, heilbrigðiskerfi fyrir alla, jafnvel vökulögunum?
Það má velta þessu fyrir sér. Viðskiptaráð hefur talið það hlutverk sitt að vara ævinlega við því að fjármunum sé eytt í almannaþágu. Sennilega er ekki til þröngsýnni félagsskapur á Íslandi. En á móti má segja, maður veit svosem alltaf úr hvaða átt Viðskiptaráðið kemur.
Nú varar Viðskiptaráð sérstaklega við loforðum sem hafa heyrst fyrir kosningarnar, og tekur sérstaklega fyrir fyrirheit um að bæta heilbrigðiskerfið, hækka lífeyrisgreiðslur aldraðra og öryrkja og auka framlög til húsnæðismála.
Viðskiptaráði líst illa á þetta – telur það illa ígrundað. Stjórnmálamenn séu að gera sér bjarnargreiða með þessu. Flestir landsmenn eru líklega þeirrar skoðunar að þarna séu þjóðþrifamál sem þarf að ganga í með einum eða öðrum hætti. Fæstir eru þó svo skyni skroppnir að halda að allt verði lagað eða komist til framkvæmda á einu kjörtímabili.
Jóhannes Geir Sigurgeirsson, fyrrverandi alþingismaður, skrifar um þetta útspil Viðskiptaráðs á Facebook, mælir skynsamlega og með sögulegri dýpt sem einatt skortir hjá excel-fræðingum Viðskiptaráðsins:
Var að hlusta á Frosta hjá Viðskiptaráði áðan tala um kosnað við kosningaloforð. Margt gott og rétt í því sem hann sagði. Samanlagður kostnaður við þau er vissulega meiri en ríkissjóður ræður við á næsta kjörtímabili. Við þetta er tvennt að athuga:
1. Það er eilíft verkefni stjórnmálamanna að velja og hafna innan þess ramma sem tekjurnar gera kleift á hverjum tíma – verkefnin eru óþrjótandi. Það sem vantar er hins vegar að greina á milli þess sem er framkvæmanlegt í bráð og þess sem verður að flokka sem langtímamarkmið.
2. Það er hlutverk stjórnmálmanna að setja fram langtímamarkmið um það þjóðfélag sem við viljum búa í. Það hefði verið hægt að skjóta velferðarkerfið allt í kaf á sínum tíma þegar fyrstu hugmyndir um það voru settar fram (snemma á síðustu öld); það voru ekki til peningar til að uppfylla draumana. Þau þjóðfélög sem þó fetuðu þann veg eru þau sem í dag eru í efstu sætum á öllum alþjóðlegum velferðarkvörðum – þau framkvæmdu það ómögulega. Ísland er því betur ofarlega á öllum þessum listum. Þrátt fyrir allt!