Hér má sjá þriðja þátt Steinsteypualdarinnar. Hann var sýndur á Rúv síðastliðinn fimmtudag. Í þessum þætti er útgangspunktur okkar árið 1945. Við fjöllum um tíma stríðsgróða sem breyttist fljótt í tíma skömmtunar. Ný hverfi sem spruttu upp utan Hringbrautar. Fyrstu íbúðarblokkir sem risu á Íslandi, það eru hús við Hringbraut en Þórbergur skrifaði um lífið þar í Sálminum um blómið.
Við skoðum glæsibygginguna Melaskóla, einstaklega vandað hús sem ber höfundi sínum, Einari Sveinssyni, fagurt vitni. Við fjöllum um harðvítugar deilur um kirkjubyggingar, Hallgrímskirkju og Neskirkju. Jónas frá Hriflu, stór persóna í þáttunum, var á móti Neskirkju en með Hallgrímskirkju. Neskirkju kallaði hann þyrpingu af kofaræksnum – það varð að fá frægan finnskan arkitekt, Eriel Saarinen, til að andmæla honum og votta að kirkjan væri í lagi.
Við fjöllum líka um Háskólann, hinn merkilega efnivið sem Guðjón Samúelsson valdi í þá byggingu og hugmyndir um torgið þar fyrir framan sem urðu að engu. Og svo skoðuðum við íbúðarhús tveggja rithöfunda auk Þórbergs – hús Halldórs Laxness á Gljúfrasteini og Gunnars Gunnarssonar við Dyngjuveg. Bæði voru þau reist í stíl sem þótti nútímalegur.
Hér á vef RÚV má horfa á þáttinn.
Við Hringbraut risu fyrstu íbúðablokkir á Íslandi. Í þeirri sem er nær á myndinni bjuggu Þórbergur Þórðarson og Lilla Hegga, söguhetja hans í Sálminum um blómið.