Hér eru þrjár ljósmyndir sem eiga það sameiginlegt að sýna allar götuna sem eitt sinn nefndist Hringbraut. Hringbrautin var nefnilega, líkt og nafnið gefur til kynna, hugsuð sem hringvegur kringum byggðina í Reykjavík. En svo fór hún að færast út fyrir Hringbrautina, það gerðist strax í kringum stríð, og hugmyndin varð úrelt. Hringbrautin skiptist þá – og úr urðu Hringbraut og Snorrabraut.

Ég hef heyrt gamla Reykvíkinga tala um Snorrabrautina sem Hringbraut.

Á þessari loftmynd má sjá hvernig Hringbrautin sveigist framhjá Landspítalanum. Það má sjá braggahverfi á Skólavörðuholti, en Heilsuverndarstöðin er enn ekki risin. Það er því víst að myndin er tekin á stríðsárunum eða skömmu eftir stríðslok. Við enda Hringbrautar var lengi Miklatorg – það er ekki orðið til þarna.

Á þessari mynd sést Snorrabrautin. Myndin er að líkindum tekin í kringum 1960. Þetta er greinilega á Sumardaginn fyrsta. Þarna eru skátar í búningum, en það má sjá snjóföl í Esjunni. Grasið er sinugult. Skátar gengu fylktu liði á Sumardaginn fyrsta. Skátaheimilið var í bragga við Snorrabraut en þar var líka í bragga dansskóli Hermanns Ragnars – fjölmargir sem voru ungir á þessum árum sóttu danstíma þar.

Þriðja myndin er tekin á nýársdag 1974 af Ólafi Sigurðssyni. Horft er yfir Hljómskálagarð til Öskjuhlíðar. Það sem vekur athygli líkt og á öðrum gömlum myndum frá Reykjavík er trjáleysið. Neðrihluti Öskjuhlíðar er nú hulinn skógi, en þarna má greinilega sjá hitaveitustokkinn sem liggur upp hlíðina. Perlan er auðvitað hvergi sýnileg, þarna eru gömlu hitaveitutankarnir efst á hæðinni, þar ofan á kom Perlan, en stóru tankarnir tveir voru rifnir.