Það sem vekur mesta athygli í prófkjöri Sjálfstæðismanna sem fór fram í dag er hin óvenjulega slaka kosningaþáttaka. Annað eins hefur varla sést hjá Sjálfstæðisflokknum í Reykjavík. Það er liðin tíð að hátt í tíu þúsund manns greiddu atkvæði í prófkjörum hjá flokknum, eitt sinn fór talan reyndar upp í næstum tólf þúsund.
Samkvæmt fréttum greiddu einungis 3340 atkvæði í prófkjörinu. Til smanburðar má nefna að í síðasta prófkjöri sem fram fór 2012 greiddu 7546 atkvæði. Þetta er semsagt fækkun upp á meira en 4000 manns. Þá voru 5438 atkvæði bak við efsta mann.
Samt hefur verið heilmikil smölun fyrir prófkjörið – og það hefur auðvitað verið fyrirferðarmikið á samskiptamiðlum. Það verður auðvitað að segjast eins og er að það eru breyttir tímar í pólitík – fjöldaþáttaka í flokksstarfi er liðin tíð – en þetta er ekki nema svipur hjá sjón hjá Sjálfstæðisflokknum.
Annað sem vekur athygli er hversu einsleitur listinn er. Af átta efstu mönnum, þeim sem eiga einhverja von í þingsæti, eru sjö lögfræðingar eða laganemar. Einungis Guðlaugur Þór Þórðarson hefur ekki verið í laganámi – hann stundaði nám í stjórnmálafræði.