Hér er hræsnin í heiminum með stóru H-i. Á meðan átökin í Sýrlandi eru að valda miklum usla og ójafnvægi í Evrópu, flóttamenn streyma þangað, neyð þeirra er hræðileg, en óvild og hatur innfæddra magnast gegn þeim – já, á sama tíma er í gangi stórfelld sala á vopnum til stríðsaðila.
Guardian greinir frá vinnu rannsóknarblaðamanna sem rekja slóð vopnasölu í gegnum ríki í Austur-Evrópu og á Balkanskaga, Tékkland, Króatíu, Serbíu, Rúmeníu, Bosníu, Montenegro, Búlgaríu og Slóvakíu. Mörg þessara ríkja eru í Evrópusambandinu. Það er greint frá því að upphæðirnar sem um er að tefla nemi meira en milljarði breskra punda, það eru hátt í tvö hundruð milljarðar íslenskra króna. Þetta eru árásarriflar, vélbyssur, sprengivörpur og fleira slíkt.
Vopnin streyma í til Miðausturlanda en fólkið streymir þaðan. Sjúkt ástand.