Það hefur verið óvenjulega friðsamlegt í íslenskum stjórnmálum upp á síðkastið – eiginlega alveg síðan stormurinn vegna Panamaskjalanna gekk yfir. Forsetakosningarnar fóru mjög friðsamlega fram, mætti jafnvel segja að þær hafi verið dauflegar. Því sem af er sumrinu hafa Íslendingar eytt í að fylgjast með fótbolta, þrasa smá um ferðamenn, og svo hafa borist tilkynningar frá stjórnmálamönnum um að þeir séu að hætta.
Yfirleitt er þeim tilkynningum tekið með nokkru jafnaðargeði. Það koma sjálfsagt einhverjir og fylla í skörðin. Enginn er ómissandi.
Skoðanakannanir sem hafa birst um fylgi flokka benda til dálítið sérstakrar stöðu. Það gæti orðið erfitt að mynda ríkisstjórn vegna þess hversu fylgið dreifist víða. Samkvæmt nýrri skoðanakönnun sem MMR birtir eru engin afgerandi stjórnarmynstur í kortunum, hvorki til hægri né vinstri. Eina tveggja flokka stjórnin sem er möguleg er ef Píratar og Sjálfstæðisflokkurinn tækju upp samstarf.
Fylgið getur auðvitað farið á talsverða hreyfingu frá þessum niðurstöðum, en þarna er ríkisstjórnin kolfallin og það myndi ekki einu sinni duga henni þótt Viðreisn kæmi inn sem þriðji flokkur í stjórn.
Á stjórnarandstöðuvængnum er sundrungin ekki minni. Píratar eru stærsti flokkurinn, en fylgi þeirra, VG og Samfylkingar nægir varla til að mynda stjórn. Það yrði að koma til fjórði flokkurinn. Viðreisn, nú eða þá Framsókn.
Nú tilkynnir Sigmundur Davíð Gunnlaugsson endurkomu sína í stjórnmálin. Hann ætlar þá að leiða Framsóknarflokkinn í kosningunum – sem verða í haust þótt hann sé mótfallinn því. Allt bendir til þess að framsóknarmenn muni leyfa honum það. Flokkurinn kemst ekki mikið neðar í skoðanakönnunum. Það er alltaf ógurlegur titringur í kringum Sigmund. Hann mætir aftur með herópið „Íslandi allt“! Framsókn undir forystu hans er ekki líkleg til að vinna með vinstri flokkunum. Og stjórnmálin verða varla jafn friðsamleg með hann inni á vellinum.
Niðurstöður nýrrar skoðanakönnunar MMR.