Eins og staðan er bendir flest til þess að rússneskum íþróttamönnum verði beinlínis meinað að keppa á Ólympíuleikunum í Ríó sem hefjast innan fárra vikna, nema þeir sem geta sannað að þeir hafi ekki notað lyf og eru til í að fara á leikana og keppa undir Ólympíufánanum. Það er ekki vel séð í Rússlandi.

Nýjustu fréttir sýna að svindlið fyrir Vetrarólympíuleikana í Sotsji 2014 virðist hafa verið altækt, bíræfið og brotaviljinn eindreginn. Í stórum stíl var átt við þvagsýni úr rússnesku keppendunum – það var skipt um piss í 100 prósent tilvika, segir í frétt BBC.

Rússneska íþróttahreyfingin hefur verið með í svindlinu, lögregluyfirvöld og ríkisstjórnin.

Þetta virkar algjörlega galið. Hvernig dettur mönnum svonalagað í hug? Hverju ætla þeir að ná fram? Hver er tilgangurinn? Halda menn að svo stórt og víðfemt samsæri komist ekki upp?

Væntanlega er markmiðið að sýna fram á rosalega íþróttafrægð- og getu. Að einhverjir fái að baða sig í frægðarljómanum, þá væntanlega helst ráðamenn, því íþróttamennirnir sjálfir skipta minnstu máli í slíku sambandi. Þeim er fórnandi.

Mesta sportidjótaríki allra tíma var gamla Austur-Þýskaland þar sem íþróttamenn voru pumpaðir fullir af óþverra til að ná sigrum í alþjóðlegri keppni. Það tókst í mörgum tilvikum, en fátt þykir fyrirlitlegra nú en hinn öfugsnúni austur-þýski íþróttaandi.

En þetta varpar stórum skugga á Ólympíuleikana – sem stríða þegar við mikinn ímyndarvanda.