Misheppnað valdarán gegn hinum ömurlega Erdogan í Tyrklandi. Blóðbað í hinni fögru Nice við Miðjarðarhafið. Trump og Boris. Maður fær kvíðahnút í magann þegar maður opnar tölvu þessa dagana.
Göngutúr við Tjörnina í Reykjavík er góður á bjartri sumarnótt. Fegurri reit í borginni er vart að finna. Sigurveig tók þessa mynd klukkan hálf tólf í gærkvöldi. Gróðurinn er svo fallega grænn – maður sér mörg tilbrigði af grænu – en húsin speglast í vatnsfletinum. Ég hef reyndar aldrei séð jafnmikill slýgróður í Tjörninni og þetta sumar. Gæti verið að hitastig vatnsins sé ástæðan?
Það sem sést ekki á myndinni eru hópar ungmenna sem fóru um garðinn í nýja leiknum Pokémon Go. Þetta er leikur fyrir snjallsíma sem útheimtir að leikendurnir séu á ferðinni utandyra. Pokémonarnir leynast víða en eru ekki sýnilegir án tækjanna. Þetta er orðið mikið æði víða um heim, vægast sagt.
Enn hefur þó ekki tekist að þróa búnað til að greina huldufólk, en hver veit nema það komi?