Hér er dæmi um hinn viðurstyggilega áróður sem dynur á Bretum í aðdraganda þjóðaratkvæðagreiðslunar um Evrópusambandið. Það er látlaust höfðað til reiði, ótta og lægstu hvata – og forsvarsmenn útgöngusinna láta sér vel líka. Skuggaleg er sú tilhugsun að einhverjir þeirra komist kannski til valda í Bretlandi eftir atkvæðagreiðsluna.
Þarna er mynd af fólki sem er að flýja stríð. Evrópusambandinu er kennt um. Það á að hafa brugðist „okkur öllum“. En það var ekki Evrópusambandið sem hóf styrjaldarreksturinn sem hefur haft þessar afleiðingar – Þýskaland og Frakkland vöruðu þvert á móti við, meðan Bretar ásamt Bandaríkjamönnum æstu til stríðs.
Þessi framsetning er bæði ljót og ófyrirleitin og hún spilar á frumstætt útlendingahatur, en kemur aðildinni að ESB í rauninni ekkert við.
Á neðri myndinni má svo sjá samanburð frá áróðri þýskra nasista á árunum fyrir seinni heimsstyrjöld.
