Andri Snær getur farið yfir Davíð, segir Össur Skarphéðinsson í pistli á Facebook síðu sinni. Hann fullyrðir líka, sem kemur varla á óvart, að Guðni Th. Jóhannesson sé öruggur með sigur í forsetakosningunum, en framboð Davíðs sé misheppnað.
Davíð Oddsson rekur afleita kosningabaráttu sem rímar ekki við tímana og er að tapa fylgi. Davíð er fallinn í 16 prósent, og mun líklega eiga erfitt með að rífa sig út úr hægfara spíral niður á við. Andri Snær er hins vegar að sækja í sig veðrið. Hann er kominn upp í 13,3 % og gæti hæglega skotist upp fyrir Davíð Oddsson á lokametrunum.
Því er slegið upp að Guðni missi fylgi milli kannanna, en staðreyndin er samt sú að það munar heilum 40 prósentustigum á honum og næsta manni, Davíð. Össur segir að þegar forysta Guðna er svo örugg, muni fleiri geta hugsað sér að kjósa Andra.
Haldi Guðni áfram öruggri forystu munu áreiðanlega margir pæla í því að flytja atkvæði sitt yfir á Andra Snæ einungis til að stuðla að því að frambjóðandi sægreifanna, Morgunblaðsins og Sjálfstæðisflokksins lendi í þriðja sæti. Framboð Davíðs er svolítið einkennilegt. Það virðist illa grundað, skringilega skipulagt og einhvern veginn rekið aftan úr forneskju. Sæmilega hnitmiðuð og nútímaleg barátta hefði þó getað fleytt honum í 30 % plús. Það gerist ekki úr þessu. Það er því alls ekki út í hött að Andri Snær nái að skjótast upp fyrir hann leyfi menn sér þann munað að kjósa taktíst í ljósi öruggrar forystu Guðna….