Hér eru myndir af líkani útvarpshúss sem hugmynd var að reisa vestur á Melum, þar sem Þjóðarbókhlaðan stendur nú. Þetta getur að líta á sýningu sem brátt opnar í útvarpshúsinu í Efstaleiti í tilefni af fimmtíu ára afmæli sjónvarpsins.

Þessi bygging, sem aldrei varð að veruleika, á sér merkilega sögu. Jónas Þorbergsson, fyrsti útvarpsstjórinn, beitti sér fyrir stofnun byggingasjóðs og safnaðist talsvert fé í sjóðinn á árunum 1940-1950. Ingvar Gíslason, sem eitt sinn var menntamálaráðherra, rakti söguna í þingræðu 1981 og talaði um stríðsgróða í þessu sambandi. Sagði Ingvar að sjóðurinn hefði verið orðinn alldigur um 1950.

Jónas beitti sér fyrir því að útvega stóra lóð vestur á Melum og fékk bandaríska arkitekta til að hanna útvarpshús. Eins og má sjá átti þetta að vera myndarbygging – og áfast við hana tónleikahús. Ingvar menntamálaráðherra sagði að þetta hús hefði verið „ágætlega hugsað í hvívetna“.

En það reis aldrei og var þetta skýringin, samkvæmt Ingvari Gíslasyni:

Byggingarsjóðurinn sem myndaður hafði verið af eins konar sparifé Ríkisútvarpsins, var í raun og veru tekinn herfangi, traustataki og fé hans ráðstafað til allt annarra þarfa en til var ætlast. M. a. var fé hans lánað til þess að ljúka Þjóðleikhúsinu. Sumt af þessu fé fór til þess að byggja íbúðarhús fyrir einhvern starfshóp í þjóðfélaginu. Hluti fjárins fór í lán til þess að koma upp húsi á horni Klapparstígs og Hverfisgötu sem Silli & Valdi voru að byggja, en þar átti útvarpið að fá inni með eitthvað af starfsemi sinni. Þá mun verðbólgan hafa étið sinn hlut af sjóðnum svo og gengisfellingar. Heyrt hef ég einnig að eftirhreyturnar af byggingarsjóði Jónasar Þorbergssonar hafi gengið til þess að kosta innréttingar í Fiskifélagshúsinu við Skúlagötu og greiða fyrir fram leigu fyrir húsnæði útvarpsins þar. — Þetta er í stuttu máli saga byggingarsjóðs Jónasar Þorbergssonar.

Franmhlið útvarpshússins sem átti að rísa vestur á Melum. Það er ekki laust við að form þess minni dálítið á Hótel Sögu sem seinna reis á svipuðum stað.

Tónlistarhúsið sem átti að vera áfast útvarpsbyggingunni.

Bakhlið útvarps- og tónlistarhúsanna, með myndarlegri tjörn.