Sigmundur Davíð Gunnlaugsson gerir kombakk og segir að ekki liggi neitt á að kjósa í haust, og hann sjái ekki að kosningar verði í september eða október.
Það er nú samt svo að Sigurður Ingi Jóhannsson forsætisráðherra hefur margítrekað að kosið verði í haust.
Ein yfirlýsingin var svohljóðandi:
Eins og fram hefur komið mun verða boðað til kosninga í haust. Dagsetning hefur ekki verið ákveðin.
Stjórnmálaflokkar eru farnir að boða til prófkjöra miðað við að kosið verði í haust – einkum og sérílagi Sjálfstæðisflokkurinn. Þar virðist semsagt vera almennur skilningur að kosningarnar verði haldnar.
Hér er svo breytt starfsáætlun Alþingis. Þarna má sjá að þingi verður frestað 2. júní, en þráðurinn verður aftur tekinn upp í ágúst á sumarþingi, sem virðist eiga að ljúka í byrjun september með eldhúsdegi.
Af þessu má ráða að kosningar eigi að fara fram í október, í fyrsta lagi 8. október, í síðasta lagi í lok mánaðarins – eða það skyldi maður ætla. Ef ekki er ætlunin að kjósa í haust er lítill tilgangur með þessu sumarþingi.
