Skoðanakannanir upp á síðkastið hníga í þá átt að Sjálfstæðisflokkurinn sé aftur orðinn stærstur – stærri en Píratarnir. Uppsveifla Pírataflokksins sem hófst af alvöru í apríl í fyrra er nokkuð að ganga niður.
Skoðanakönnun Félagsvísindastofnunar sem Mogginn birtir í dag staðfestir þetta. Í fyrirsögn fréttarinnar segir að taflið sé að snúast við.
En þá er þess að geta að sammerkt er með flestum könnunum undanfarið að hlutföllin milli stjórnarflokkanna og stjórnarandstöðunnar breytast lítið. Mest virðast þetta vera tilfærslur innan liðsins.
Sjálfstæðisflokkur tekur frá Framsókn, Vinstri grænir taka frá Pírötum – VG er allt í einu komið á mikla siglingu. Píratar verða kannski ekki sá afgerandi forystuflokkur sem leit út fyrir um tíma.
Stjórnarflokkarnir hafa verið með á bilinu 35-37 prósent samanlagt og þurfa að bæta heilmiklu við sig ef ríkisstjórnin á að halda velli. Í kosningunum 2013 var þessi tala 51 prósent.