Hér heima er bollalagt um hvort spilling í stjórnmálum hafi áhrif á orðspor Íslands í útlöndum.
Á vef TV2 í Danmörku birtist grein þar sem segir beint út að Ísland sé bananalýðveldi.
Þetta er reyndar dálítið villandi því greinin fjallar aðallega um bananaræktun sem eitt sinn var stunduð hér í gróðurhúsum.
Íslendingar voru mjög ánægðir með þetta, þeir töldu sig vera eina landið í Evrópu þar sem bananar væru ræktaðir, og erlendir tignarmenn voru gjarnan dregnir í gróðurhús og látnir borða banana.
Hér er til dæmis frétt í Morgunblaðinu frá 1966. Þarna segir frá heimsókn U Thants, aðalritara Sameinuðu þjóðanna. Hann fór í gróðurhús í Hveragerði með Emil Jónssyni utanríkisráðherra og fékk auðvitað banana.
Nú er öldin önnur. Íslendingar eru hættir að vera svona barnslega stoltir af banönunum sínum. Nú nota þeir innflutta banana, og eins og segir í greininni á vef TV2 er þeim varpað að litla gráa húsinu þar sem þing landsins kemur saman, til að minna stjórnmálamenn á að þeir hafi gert Ísland að bananalýðveldi – líkt og greinarhöfundur, Lars Toft Rasmussen, orðar það.