Svonefndar netkannanir sem sumir fjölmiðlar standa fyrir eru mjög skemmtilegar – svona á sinn hátt.
Á vef Hringbrautar er kynnt með pompi og prakt svona könnun þar sem niðurstaðan er sú, að minnsta kosti enn sem komið er, að Guðni Th. Jóhannesson sé tvöfalt vinsælli en Ólafur Ragnar Grímsson. Segir að þetta séu áhugaverðar niðurstöður.
Á vef Útvarps Sögu er hins vegar könnun þar sem er einfaldlega spurt hvort þátttakendur vilji að Guðni Th. Jóhannesson bjóði sig fram til forseta.
Óhætt er að segja að niðurstaðan sé allt öðruvísi en á Hringbraut, að minnsta kosti enn sem komið er, því auðvitað er hægaleikur fyrir aðdáendur Guðna eða andstæðinga að hrúgast þarna inn og fikta í niðurstöðunum, líkt og er líka hægt að gera við Hringbrautarkönnunina.
Það væri auðvitað hægt að komast að enn einni niðurstöðunni með því að hræra saman netkönnunum Hringbrautar og Útvarps Sögu.
En þeir sem láta sig forsetakosningarnar einhverju varða hljóta að bíða eftir alvöru skoðanakönnunum. Fyrirtækjunum sem framkvæma slíkar kannanir er reyndar nokkur vandi á höndum, á bara að spyrja um þá sem þegar hafa boðið sig fram eða á líka að hafa þá með sem eru að hugsa málið.
Því það sem flestir eru að ræða þessa dagana er hvort Guðni Th. eigi séns á að fella Ólaf Ragnar?