Sala á rafbókum virðist hafa rekist upp undir þak í Bretlandi og Bandaríkjunum þar sem sala þeirra hefur verið mest.
Salan á rafbókum hefur margfaldast ár hvert, en nú ber svo við að hún hefur stöðvast.
Bókabúðir hafa verið að loka í stórum stíl á hinu enskumælandi svæði. Menn hafa nánast beðið eftir því að síðustu raunverulegu bókabúðirnar myndu deyja drottni sínum. Amazon og Kindle hafa virst óstöðvandi.
Í frétt í Financial Times segir að sala á bókum hjá keðjunni Waterstone hafi aukist um 5 prósent fyrir jólin, raunar eftir talsverða endurskipulagningu í búðunum. Í Foyles jókst bóksalan um 11 prósent. Um leið er fullyrt að sala á lestölvum sé langt undir væntingum, það hefur gerst bæði austan hafs og vesta.
Ýmis teikn eru um að fólki sé farið að leiðast að kaupa bækur og tónlist á rafrænu formi – svona eftir að mesta nýjabrumið er farið af. Vínýlplötur njóta nú mikilla vinsælda meðal ungs fólks – og hvarvetna er hægt að sjá plötuspilara til sölu, marga mjög skemmtilega hannaða.
Bókaútgefandinn Kristján B. Jónasson talar um „stafrænt glerþak“ á Facebook. Það er vel orðað.