Víða má lesa um þessi áramót að heimurinn sé á leið til heljar, það er til dæmis vitnað í Martin Dempsey, formann herráðs Bandaríkjanna, sem sagði fyrir þingnefnd á árinu að heimurinn sé hættulegri staður en nokkru sinni fyrr.
En það er ekki raunin, ef marka má grein sem fræðimennirnir Steven Pinker og Andrew Mack skrifa í vefritið Slate. Heimurinn hefur aldrei verið friðsamlegri, segja þeir.
Heimurinn sé ekki að falla saman þrátt fyrir ISIS, Gaza, Donetsk, Krímskaga, ebólu og hættulegar löggur.
Þeir vara við því að fólk myndi sér skoðun á ástandi heimsmála út frá daglegum fréttum – þær eru settar fram þannig vekur ótta. Ef marka má fréttir er heimurinn alltaf að farast.
Pinker og Mack vísa í tölfræði. Hún sýnir að glæpatíðni er mun lægri í heiminum en áður. Ofbeldi gegn konum hefur minnkað mikið og réttindi kvenna hafa aukist. Hið sama er að segja um ofbeldi gegn börnum.
Það eru fleiri lýðræðisríki í heiminum en áður og færri einræðisríki. Þrátt fyrir framgöngu ISIS eru fjöldamorð mun fágætari en lengstum á tuttugustu öldinni. Mun færra fólk týnir lífi í stríðsátökum. Stríðsátökin eru mjög staðbundin og ekki sérstök hætta á að þau breiðist út, enda eru alþjóðastofnanir sterkari en á fyrri hluta tuttugustu aldar.
Þetta eru semsagt ekki sérlega hættulegir tímar, þvert á móti. Fleiri Bandaríkjamenn deyja til dæmis árlega vegna býflugnastunga en vegna hryðjuverka.
Eitt af línuritunum sem Pinker og Mack birta, fjöldi látinna í stríði frá 1945.