Venjan hefur verið sú í stjórnmálum á Íslandi að flokkar eða minnihlutar tilnefna sína menn í stjórnir og fá þá kosna mótakvæðalaust. Þannig er það á Alþingi og eins í sveitarstjórnum.
Enda hefur verið talið að flokkunum sé almennt treystandi til að tilnefna sæmilegt fólk. Þeim hefur semsagt verið þetta í sjálfsvald sett.
Nú ber svo við að borgarfulltrúar eru gagnrýndir fyrir að greiða ekki beinlínis atkvæði gegn þekktum íslamó- og hómófób sem Framsóknarflokkurinn tilnefndi í eina nefnd borgarinnar.
Kannski hefði verið betra að meirihlutinn hefði einfaldlega greitt atkvæði á móti – en það er þó ekki samkvæmt hefð.
Áslaug Friðriksdóttir, borgarfulltrúi Sjálfstæðisflokks, skrifar á Facebook:
Mér finnst það afar furðulegt að ætla að fara að hafa áhrif á það hverjir eru skipaðir í ráð og nefndir af öðrum flokkum. Mér er oft meinilla við málflutning þeirra sem ég hef samt kosið til að sitja í nefndum af því einfaldlega að hverjum flokki á að vera í sjálfsvald sett hver er valinn. Ef þetta samkomulag er ekki virt þá má segja að meirihlutinn gæti hugmyndafræðilega komið í veg fyrir setu þeirra sem þeim eru ekki „þóknanlegir“. Það gengur einfaldlega ekki upp.
Það eru framsóknarmenn sjálfir sem verða að taka á sínum innanmeinum, aðrir gera það ekki fyrir þá. Stefán Bogi Sveinsson, bæjarfulltrúi í Fljótsdalshéraði, gerir það reyndar hressilega á Facebook síðu sinni:
„Viðbrögðin í gær, bæði út á við og inn á við á lokuðum síðum flokksmanna, sýndu afdráttarlaust að allur þorri flokksmanna er kominn með upp í kok af framgangi borgarstjórnarflokksins.“