Vegir í Rússlandi eru frægir fyrir hvað þeir eru skelfilegir. 28 þúsund manns dóu í umferðarslysum í Rússlandi 2011, samkvæmt opinberum tölum. Það eru 19 dauðsföll á hverja 100.000 íbúa, á Íslandi eru þau 3.
Nú hefur Pútínstjórnin fundið lausn á þessum vanda. Hún felst í að banna transfólki að aka bíl.
Þetta er brilljant hugmynd. Eða þannig.
Þegar ég fór til Moskvu fyrir nokkrum árum var mér sagt að það sem þyrfti helst að varast í umferðinni væri tvennt. Annars vegar lögreglan sem væri á höttunum eftir fólki til að kúga fé út úr. Og hins vegar embættismönnum og fólki af því kalíberi sem ekur um á ofsahraða með bláa sírenu á bílþakinu. Svona bifreiðar mega fara fram úr öllum öðrum, líka þar sem eru umferðarhnútar.
Þessar sírenur eru frægt tákn um forréttindi í Rússlandi. Það eru ekki bara háttsettir embættismenn sem fá þær, heldur er líka hægt að verða sér úti ef maður hefur mikil áhrif eða er nógu duglegur að múta.
Dæmi eru um að fólk á þessum bifreiðum hafi ekið á aðra vegfarendur – og komist upp með það átölulaust.
Ein aðferðin til að mótmæla þessu er sú að setja bláa leikfangafötu upp á bílþak – ádeilan skilst öllum í Rússlandi. En forréttindastéttin með bláu sírenurnar heldur áfram að fara sínu fram. Og nú skal banna transfólki að keyra. Verða það samkynhneigðir næst?