Fréttamyndir fara nú um heiminn sem sýna ISIS-liða í Mosul í Írak myrða tvo samkynhneigða menn – eða svo er sagt – með því að henda þeim fram af hárri byggingu.
Þetta eru sérlega óhugnalegar myndir, það má sjá mennina þegar þeim er varpað fram af húsinu, þegar þeir hrapa til jarðar og þar sem þeir liggja í jörðinni. Stór hópur af körlum stendur fyrir neðan og hrópar og gólar.
Ofbeldið magnast stöðugt innan þessarar hreyfingar, því sagt er að á sama tíma hafi kona verið tekin af lífi með því að grýta hana – hún átti að hafa stundað hórdóm. Þetta mun vera í Niniveh.
Að auki er sagt að sautján ungir karlmenn hafi verið krossfestir fyrir stuttu, í hefndarskyni fyrir fall bardagamanna úr röum ISIS.
Eiginlega er þetta svo mikill hryllingur að mann skortir orð. Það er skelfileg tilhugsun að ungt fólk frá Evrópu fari til Sýrlands og Íraks til að berjast fyrir þennan ömurlega málstað. En svo er það nú samt eins og sjá má á þessu korti. Hvernig á að taka á móti þessu fólki þegar það kemur heim eftir að hafa lifað í firtum og sturluðum heimi manndrápa og grimmdar? Er von til að einhverjir sjái að sér?
En svo ætla Saudi-Arabar, þaðan sem kemur mikið af hugmyndafræði ISIS og stuðningur við jihadista, að reyna að loka sig frá norðrinu með því að byggja risastóran vegg til að reyna að halda hryllingnum úti.