Furðulegur er hann, og dálítið hrollvekjandi, þessi áhugi milljarðamæringanna sem stjórna Qutar á að halda stór íþróttamót.
Heimsmeistaramótið í fótbolta sem halda á þar 2022 er alþjóðlegt hneyksli. Mikill fjöldi aðfluttra verkamanna sem vinnur við að byggja leikvanga býr við hörmulegan aðbúnað. Margir hafa dáið, vegna slysa og vegna hita og örmögnunar.
Hið gerspillta og mútuþæga alþjóðaknattspyrnusamband hefur ákveðið að keppnin fari fram þarna (keppnin 2018 verður í Rússlandi!). En verði keppnin haldin um sumar er hitinn oft meiri 40 gráður. Hugsanlegt er að keppnin verði um vetur þegar hitinn er minni, en fyrir því er engin hefð – þá yrði að stöðva deildarkeppnir sem eru haldnar á þeim tíma.
Það er eiginlega ómögulegt.
Nú er heimsmeistaramót í handbolta haldið í Qatar, þrátt fyrir að þar í landi sé enginn áhugi á þeirri íþrótt. Stjórnendur ríkissins hafa reyndar klastrað saman landsliði með fáránlegum tilkostnaði og byggt íþróttahallir.
Þær standa hins vegar galtómar eins og sjá má á þessari mynd, með henni fylgir háðskur texti þar sem stendur „Ofurspenntur manngrúi á leik Spánar og Hvíta-Rússlands“.