Ég held að sé alveg rétt sem sums staðar er fullyrt, nefnilega að ofstækismönnum eins og þeim sem frömdu morðin á skrifstofu Charlie Hebdo í París sé skítsama um hvort hæðst sé að spámanninum Múhammeð eða birtar af honum teikningar.
Þeir eru einfaldlega að leita að tilefni til að fremja morð og ódæðisverk, magna upp hatur og sá glundroða.
Fyrst og fremst eru þeir ofbeldisdýrkendur – nihilistar.
En trúin er yfirvarp þeirra. Og hlutir sem við teljum sjálfsagða, í vestrænum samfélögum – eins og skopmyndir – verða þeim átylla til að drepa fólk.
Það versta sem við getum gert andspænis þessu er að ritskoða okkur sjálf, eins og á tíma Jótlandspóststeikninganna. Viðbrögðin eiga þvert á móti að vera þau að ganga fram af stolti og einurð og verja tjáningarfrelsið, einn mikilvægasta arf okkar Vesturlandabúa.
Þess vegna er mikilvægt að þingheimur sameinist fljótt og vel um tillögu Pírata sem kveður á um afnám laga gegn guðlasti. Þetta er 125. grein almennra hegningalaga. Hún hefur alltaf verið vond og óþörf, en sjaldan sem nú.
Í greinargerð með frumvarpinu segir:
„Það er hinsvegar ábyrgðarhluti lýðræðissamfélaga að svara slíkum árásum með þeim skýru skilaboðum að tjáningarfrelsið muni aldrei lúta fyrir manndrápum, ofbeldi eða hótunum. Meðal annars af þeirri ástæðu leggja flutningsmenn frumvarpsins til að Ísland leggi sitt af mörkum við að koma þeim skilaboðum á framfæri með því að gera frumvarp þetta að lögum.“