Menn velta því fyrir sér hvort verði meiri breytingar á ráðherraskipan í dag en að einfaldlega verði settur sjálfstæðismaður í embætti innanríkisráðherra.
Innanríkisráðuneytið er ekki nema hálft núna frá því sem var – dómsmálaráðuneytið var sett í forsætisráðuneytið þegar vandræði Hönnu Birnu Kristjánsdóttur fóru að ágerast. Það var heldur vandræðalegur gjörningur og varla ætlunin að Sigmundur Davíð Gunnlaugsson fari lengi með dómsmálin.
Innanríkisráðuneytið nú er því að megninu til samgönguráðuneytið gamla – kannski verður sameinað aftur í dag?
Framsóknarflokkurinn á hugsanlega inni ráðherra miðað við fjölda ráðherra í ríkisstjórn. Þeir eru nú fjórir frá Framsókn og fimm frá Sjálfstæðisflokki. Sigurður Ingi Jónsson gegnir embætti umhverfisráðherra meðfram því að vera landbúnaðar- og sjávarútvegsráðherra.
Kannski væri nú heppilegur tímapunktur að skipa sérstakan umhverfisráðherra – ef á annað borð er áhugi á því? Þar virðist vera næst í röðinni Vigdís Hauksdóttir, líka ef á að gæta að kynjahlutföllum. Vangaveltur hafa verið um að Sigmundur Davíð vilji ekki fá hana inn í ríkisstjórn. En þess er að gæta að Vigdís er í feiki áhrifamikilli stöðu. Hún er formaður valdamestu þingnefndarinnar, sjálfrar fjárlaganefndar, og hefur aldeilis látið taka til sín sem slíkur.
Hugsanlegt er að áhrif Vigdísar myndu beinlínis minnka við að setjast í ráðherrastól.