Í þessari ljósmynd er margháttuð saga. Hún er tekin 1963, fyrir jól, ljósmyndarinn mun vera Jóhann Vilberg, myndin er úr Ljósmyndasafni Reykjavíkur – þeirri merku stofnun.
Í þessu húsi við horn Skólavörðustígs og Bergstaðastrætis var leikfangabúð, hét einfaldlega Leikfangahúsið. Fólk í jólahugleiðingum er að virða fyrir sér leikföng í glugganum.
Þetta var tími þegar mestöll verslun var í miðbænum – það var enn mýri þar sem Kringlan er. Fleiri leikfangabúðir voru í bænum, Liverpool við Laugaveginn – það nafn var fornfrægt í verslun í Reykjavík. Svo var leikfangabúð á Smiðjustígnum, nálægt horninu við Laugaveg – þar var „hási karlinn“ eins og hann hét meðal barna, seldi mikið af Matchbox-bílum sem voru afar vinsælir.
En aftur að Skólavörðustígnum. Leikfangabúðin þar var í svokölluðu Bergshúsi þar sem Þórbergur Þórðarson bjó og gerði síðar frægt í Ofvitanum.
Svo var þetta allt rifið, en nú er þarna meðal annars Kaffifélagið – þar drekk ég morgunkaffið mitt. Það er farið að kalla svæðið þarna fyrir utan Morgunstéttina.
Það eru ekki hvít jól þarna, en bifreiðin á myndinni – manni sýnist hún vera af gerðinni Ford Taunus.