Öldungadeildarþingmaðurinn Elizabeth Warren hélt í fyrradag einhverja mögnuðustu ræðu sem hefur heyrst lengi í stjórnmálum – og ekki bara í Bandaríkjunum. Hún var að mótmæla kafla í svokölluðu Dodd-Frank frumvarpi þar sem eru enn opnaðir möguleikar til að láta skattborgara greiða tap banka – þar sem bankar eru enn þeirri stöðu að vera of stórir til að falla.
Warren beindi einkum spjótum sínum að hinum ofurvolduga banka Citigroup sem hefur gríðarlegt vald yfir stjórnmálunum í Bandaríkjunum.
Í staðinn segir Warren að þurfi að brjóta upp stærstu bankana – hún vitnar í Teddy Roosevelt sem á sínum tíma braut á bak aftur auðhringa sem höfðu lagt undir sig pólitíkina í Bandaríkjunum og ógnuðu lýðræðinu.
Það er jafnvel talað um þetta sem Cross of Gold ræðu, í því felst að hún minni á fræga ræðu sem haldin var af stjórnmálamanninum William Jennings Bryan 1896 og hafði djúpstæð áhrif á Demókrataflokkinn.
Viðkvæði Bryan var að ekki mætti festa alþýðu manna upp á gullkrossa. Warren flytur ræðu sína af mikilli festu og rökvísi – það er tími til að hlusta.