Á vefnum Svipmyndir úr fortíðinni er að finna þessa dásamlegu vetrarmynd úr Tjarnargötunni. Þetta er póstkort frá 1925, segir á vefnum. Myndin er greinilega lituð eftir á.
Við sjáum að Tjarnarbakkinn er öðruvísi en nú, talsvert þrengri. Snjórinn er líklega nýfallinn, það virðist ekki vera ís á Tjörninni.
Við enda götunnar, þar sem Ráðhúsið stendur nú, eru þrjú hús, samkomuhúsið Báran, Vonarstræti 12, sem stendur nú við Kirkjustræti, og svo er hús sem var flutt út í Litla-Skerjafjörð. Ef ég man rétt var þar um tíma aðstaða þar sem krakkar gátu reimt á sig skauta.
Það er ró yfir þessari mynd og þau eru falleg börnin þarna fremst. Hvergi er vélknúið farartæki að sjá, þótt reyndar sjáist hjólför í snjónum. Það verður að segjast eins og er að ekki hefur bílamergðin fegrað borgirnar okkar.