Á hverju ári heyrir maður kvartað undan því að ekki sé gert meira úr fullveldisdeginum.
Nú sé ég skrifað að það sé ekki gott að við séum farin að halda upp á Halloween, Thanksgiving og Black Friday – en vitum svo ekkert í okkar haus um 1. desember.
Við erum náttúrlega frekar ameríkaniseruð í þessu landi.
Þessi mynd er frá 1. desember 1918, daginn sem Ísland varð fullvalda. Mér hefur alltaf fundist hún fremur dapurleg. Það virkar eins og fólkið standi hnípið kringum stjórnarráðshúsið.
Kannski er það ekki furða, spænska veikin gekk yfir bæinn þessa daga, heimstyrjöldinni fyrri var nýlokið, Katla var nýbúin að gjósa og það hafði verið mikil kuldatíð þetta ár.
Fullveldið var náttúrlega merkilegur áfangi, en myndin ber ekki vott um mikla gleði vegna þess. Það hefur stundum verið reynt að hafa einhver hátíðarhöld 1. desember, en það hefur ekki enst lengi – lengst voru það háskólastúdentar sem héldu samkomur sem voru þokkalega fjölsóttar. Þær urðu reyndar tilefni deilna á tímabili vegna þess að róttækir vinstri menn úr röðum stúdenta lögðu þær undir sig.