Við lifum á öld þegar stórfyrirtæki geta keypt heila stjórnmálaflokka, nánast eignast ríkisstjórnir og hafa heri lögfræðinga á sínum snærum til að móta lögin, fara á snið við þau, reka erindi sín.
Við finnum áhrif þessa út um allan heim – líka á Íslandi. Og stórfyrirtækin hafa líka feikilegt afl til að móta almenningsálitið sér í hag.
Á vef International Consortium of Investigative Journalists má nú lesa gögn – byggð á leka – sem sýna hvernig stórfyrirtæki nota skattaskjól í Lúxemborg til að komast hjá því að greiða skatta í öðrum löndum.
Það eru milljarðar á milljarða ofan sem fara þarna í gegn, en meðal fyrirtækja sem þarna eru nefnd til sögunnar eru Pepsi, IKEA, AIG og Deutsche Bank.
Í einu húsi, Rue Guillaume Kroll númer 5, eru staðsett 1600 fyrirtæki.
Það fylgir svo sögunni að endurskoðunarfyrirtækið Pricewaterhouse Coopers aðstoði mörg af þessum fyrirtækjum við skattaundanskotin.
Þarna er meinsemd sem þarf að komast fyrir – lýðræðisríki geta ekki þola að stórfyrirtæki og fjármálaöfl séu utan og ofan við samfélagið.