Fatabúðin var verslun sem rakti sögu sína til 1916. Seldi sængurföt og slíkt – það er einhver mesti lúxus sem hægt er að hugsa sér að leggjast til svefns í brakandi hreinum sængurfötum úr góðu efni.
Fyrir stuttu hætti verslunin, en hún var til húsa í stóru fallegu húsi sem er á gatnamótum Skólavörðustígs, Klapparstígs og Njálsgötu. Húsnúmerið er Skólavörðustígur 21.
Síðan hefur þar starfað reglulega falleg búð sem selur skyrtur. Það sem er mikilvægast er að innréttingarnar úr Fatabúðinni halda sér enn. Þær munu vera síðan 1947.
Nú skilst manni að standi til að opna asískan veitingastað í þessu húsnæði. Annar vinsæll veitingastaður, Noodle Station, er þar fyrir. Það væri afar vont ef það þýddi að menningarverðmætin sem eru fólgin í innréttingunum myndu hverfa.
Því hús eru ekki bara ytra byrði. Fágætar innréttingar hafa verið skemmdar á undanförnum árum, eins og til dæmis Naustið, búð Egils Jacobsens í Austurstræti og Mímisbar á Hótel Sögu.
Eins og einn vinur minn á Facebook orðar það:
Maður bíður með öndina í hálsinum að Mokka verði breytt í lopapeysubúð.