Það er ótrúleg hugmynd að aðstoðarmaður ráðherra eða ráðherra sjálfur geti fengið upplýsingar úr réttarkerfinu að vild. Barasta með símtali. Þess vegna í óskráðan síma.
Við getum ímyndað okkur hvað þetta getur haft í för með sér. Ráðherra og aðstoðarmenn sitja á skrifstofu og panta alls kyns upplýsingar um fólk sem þeim er í nöp við.
Nota þær kannski, dreifa áfram eftir hentugleikum. Hafa þær í bakhöndinni.
Þetta gengur auðvitað ekki og því verður varla trúað að lögreglustjórinn sem var á Suðurnesjum og er nú í Reykjavík trúi því að þetta sé eðlilegur framgangsmáti.
Í þessu samhengi virkar ráðherra ekki sem yfirmaður lögreglu – þótt hann kunni að fara með lögreglumál í ríkisstjórn.
Fréttablaðið fjallar um þetta mál í morgun og segir að lögreglustjórar sem blaðamaður talaði við hafi heldur ekki kannast við að þetta verklag tíðkaðist. Einn lögreglustjórinn segir að þessi vinnubrögð séu undarleg.
Blaðið hafði einnig samband við Ragnhildi Hjaltadóttur, ráðuneytisstjóra í innanríkisráðuneytinu og hefur eftir henni þessi orð:
Ragnhildur Hjaltadóttir, ráðuneytisstjóri í innanríkisráðuneytinu, telur aðstoðarmenn ekki hafa heimild til að óska eftir gögnum um einstök mál sem heyra undir ráðherra þeirra. Aðstoðarmenn geti einungis óskað eftir gögnum sem varða pólitísk störf ráðherra sem þeir vinna fyrir eða stefnumótun. Ragnhildur bendir jafnframt á að rannsókn lögreglu á sakamálum og meðferð ákæruvalds lýtur ekki eftirliti dómsmálaráðherra heldur ríkissaksóknara sem er æðsti handhafi ákæruvalds.