Samkvæmt nýrri skoðanakönnun Fréttablaðsins eykst fylgi Sjálfstæðisflokks úr 30,3 prósentum í 32,9 en Framsóknarflokks úr 8,7 prósentum í 12,8 – þarna er miðað við Fréttablaðskönnun frá því í október.
Þetta bendir semsagt til þess að skuldaleiðréttingin auki fylgi stjórnarflokkanna.
Þess verður þó að geta að Fréttablaðskönnunin í október var nokkuð á skjön við aðrar kannanir, Sjálfstæðisflokkurinn var þar með miklu meira fylgi en í öðrum könnunum en Framsókn með talsvert minna fylgi.
Þannig var Sjálfstæðisflokkurinn með 25,2 prósent í síðasta Þjóðarpúlsi Gallup en Framsókn með 11 prósent. Þetta eru tölur sem birtust upphafi þessa mánaðar.
Eins mældi MMR fylgi flokkana í byrjun mánaðarins, þá var Sjálfstæðisflokkur með 23,6 prósent en Framsókn með 12,3 prósent.
Sé miðað við þessar kannanir er fylgi Sjálfstæðisflokks að taka risastökk, en Framsókn ekki að þokast nema eilítið upp á við.
Líklegt er semsagt að við þurfum að bíða frekari mælinga til að sjá hvaða áhrif skuldaleiðréttingin hefur á fylgið.