Styrmir Gunnarsson sagði frá því í minningargrein um Eyjólf Konráð Jónsson á sínum tíma að einhvern tíma þyrfti að skýra frá því hvernig sjálfstæðismenn njósnuðu um kommúnista í kalda stríðinu.
Það þarf ábyggilega að skýra þetta út fyrir sumum lesendum.
Eyjólfur Konráð, eða Eykon, var ristjóri Morgunblaðsins, einn af stofnendum Almenna bókafélagsins, einn helsti hugmyndafræðingur hægri manna á Íslandi – hann var mjög virkur í baráttunni í kalda stríðinu. Styrmir var ungur hægri maður, blaðamaður á Morgunblaðinu og ritstjóri þess frá ungum aldri.
Njósnir Styrmis virðast aðallega hafa verið fólgnar í því að fá upplýsingar frá manni sem sótti fundi hjá sósíalistum – þeir voru kallaðir kommúnistar í Mogganum og sumir þeirra voru það vissulega þótt átrúnaðurinn á Sovétríkin færi dvínandi.
Þessum upplýsingum var síðan miðlað í Morgunblaðið sem greindi furðu nákvæmlega frá innri málefnum sósíalista.
Það er spurning hvort eigi að kalla þetta njósnir hjá Styrmi – kannski mætti frekar nota hið vinsæla orð „leka“. Það er frekar að maður staldri við hlut Eykons, sem var í tengslum við bandaríska sendiráðið.
Þetta skýrist nánar í bók Styrmis sem kemur út að manni skilst í næstu viku. Hálf öld er liðin frá þessum atburðum og það er kannski spurning hvað áhuginn er mikill hjá öðrum en sagnfræðingum, en þettta fyllir vissulega upp í ákveðna mynd. Og það verður forvitnilegt að heyra hver verða viðbrögð forystumanna sósíalista sem enn eru á lífi – grunaði þá að væri uppljóstrari í þeirra röðum?
Í bókinni mun Styrmir líka gera upp við sjálfan sig og þá stjórnmálahreyfingu sem hann ólst upp við. Faðir hans hallaðist til nasisma sem og fleiri fjölskyldumeðlimir. Það eru þungar klyfjar en Styrmir skoðar hvaða áhrif þjóðernissósíalisminn hafði á hann sjálfan og framgöngu hans í kalda stríðinu.