Framsóknarflokkurinn er vandræðum vegna fylgisleysis. Sett er fram tillaga um að taka skipulagsvald af Reykjavíkurborg. Þetta er tilkynnt með miklum bægslagangi – þingmennirnir sem mæla fyrir þessu eru mjög herskáir. Það er ekki mikill sáttahugur þar.
Nú hellir Einar Kárason rithöfundur olíu á eld með því að segja að þessi tillaga sé komin frá „hyskinu á landsbyggðinni“.
Þeir sem lögðu fram tillöguna eru líklega himinlifandi. Þetta var einmitt tilgangurinn, að ná fylgi með þeirri gamalkunnu aðferð að efna til ófriðar, reka fleyga milli landsbyggðar og borgar.
En staðreyndin er sú að þessi tillaga beinist ekki síst að Hönnu Birnu Kristjánsdóttur innanríkisráðherra, það er hægt að líta á þetta sem aðför að henni. Það er hún sem fer með þessi mál í ríkisstjórninni og það er hún sem setti á stofn Rögnunefndina sem á að skoða kosti í flugvallarmálinu. Um leið og það samkomulag var gert var því í raun frestað í tíu ár að ákveða framtíð flugvallarins. Fyrr á öldinni var gert ráð fyrir að hann færi 2016.
Hanna Birna segir að ekki komi til greina að taka skipulagsvaldið af Reykjavík. Í sama streng tekur Halldór Halldórsson, oddviti Sjálfstæðisflokksins í Reykjavík. Halldór vill hafa flugvöllinn áfram á sínum stað – en hann segist vera „algjörlega á móti“ þessu. Halldór er líka formaður Sambands íslenskra sveitarfélaga.
Flugvöllurinn er dæmigert mál sem er hitað upp aftur og þá fara margir beint á suðupunkt. Nú snýst málið um norðuausturflugbrautina, sem var allt í einu fundið upp á að kalla „neyðarbraut“. Það hefur lengi staðið til að loka þessari flugbraut og um það var sátt – í stórri úttekt sem var gerð 2007 er hún úr sögunni og ekki talin nein vá vegna þess. Hið sama var uppi á teningnum 2004 þegar lögð voru drög að byggingu samgöngumiðstöðvar við Reykjavíkurflugvöll. Í bæði skiptin komu flugmálayfirvöld að málinu.
Nú er spurning hvað verður um þetta frumvarp. Halldór Halldórsson segist ekki trúa að meirihluti þingmanna sé fyrir málinu. Það er líka spurning hvað ríkisstjórnin hugsar – hvort vilji sé til að veita málinu framgang gegnum þingið. Því eins og segir beinist þetta líka gegn innanríkisráðherra og varaformanni Sjálfstæðisflokksins, Hönnu Birnu Kristjánsdóttur.
Á mánudaginn er svo von á fréttum af skuldaleiðréttingunni sem er aðalmál Framsóknarflokksins. Kannski þagnar þessi umræða barasta þá. En í raun er merkilegt að þetta útspil, þar sem eru magnaðar upp gamlar deilur, skuli koma svo fáum dögum á undan leiðréttingunni miklu.
