Frá því er skýrt í Haaretz, besta dagblaði í Ísrael, að Svíar séu fyrsta Evrópuþjóðin til að viðurkenna sjálfstæði Palestínu.
Ísraelsmenn eru stórmóðgaðir, og segir öfgamaðurinn Avigdor Liberman, utanríkisráðherra Ísraels, að utanríkispólitík sé flóknari en að skrúfa saman Ikea-húsgögn.
Þetta er svosem nokkuð fyndið hjá honum, en líklega ekki rétt.
En auðvitað er farið rangt með í þessari frétt – eða hvað?
Ísland viðurkenndi sjálfstæði Palestínu í desember 2011, eins og lesa má í þessari tilkynningu utanríkisráðuneytisins.
Á sama tíma grasserar nýlendustefna Ísraels áfram í Jerúsalem. Gideon Levy, ísraelskur blaðamaður, kallar hana höfuðborg apartheid og spáir því að uppreisn brjótist út í borginni. Bandaríkjastjórn er alveg að gefast upp á Netanyahu og liðinu í kringum hann, í nýlegu viðtali kallaði háttsettur embættismaður í Washington hann „heigul“ og „hænsnaskít“. Bandaríkjastjórn hefur reynt að fjarlægja sig frá þessum ummælum, en samt er talið að þau sýni hvernig ráðamenn þar hugsi í rauninni um Ísraelsstjórn.