Er kokteilsósan íslensk?
Sú saga hefur verið lengi á kreiki og þessu heldur Úlfar Eysteinsson matreiðslumaður fram. Hann segir að Maggi á Aski hafi fundið upp kokteilsósuna – líklega á sjöunda áratugnum.
Þá var blandað saman majonesi og tómatsósu – hún var reyndar Vals, aðallega búin til úr eplum og sykri, þar kemur vissulega ákveðið íslenskt element inn í. Kannski má segja að sú útgáfa kokteilsósunnar sé íslensk?
Askur var þá vissulega mikill frumherjastaður. Þar var hægt að fá hamborgara og kótilettur sem voru steiktar yfir opnum eldi.
En ef maður legst í smá rannsóknarvinnu má sjá að saga kokteilsósunnar er nokkuð margslungin.
Í Bandaríkjunum er sagt að Arctic Chain veitingahúsakeðjan fá Utah hafi fundið upp kokkteilsósuna árið 1948. Þar er þetta kallað fry sauce eða burger sauce.
Í Frakklandi er þetta kallað sauce américaine eða einfaldlega ketchup-mayo, en í Brasilíu rosé-sósa.
Í Argentínu er líka hefð fyrir þessari sósu en þar kallast hún golf-sósa. Þar í landi er almannarómur að sósan hafi verið fundin upp um miðjan þriðja áratug síðustu aldar í golfklúbbi í Mar del Plata.
Kokteilsósa? Nei, golfsósa frá Argentínu. En þeir áttu auðvitað aldrei Vals tómatsósu.