Í Kiljunni á miðvikudagskvöld fjöllum við um Svarthvíta daga, það er æskusaga Jóhönnu Kristjónsdóttur. Þarna segir frá uppvexti Jóhönnu í nýju hverfi sem var að rísa vestur á Melum, í fjölskyldu þar sem ríktu mjög borgaraleg gildi, æskuástum og svo auðvitað bróður hennar, honum Braga.
Í þættinum er viðtal við Mikhail Shiskin. Hann þykir einn merkasti nútímahöfundur í Rússlandi, hefur hreppt öll helstu bókmenntaverðlaun þar í landi. Út er komin eftir hann Bréfabók í íslenskri þýðingu Áslaugar Agnarsdóttur. Shiskin er ómyrkur í máli þegar Pútín og stjórnarfar í Rússlandi er annars vegar.
Við skoðum bækur frá blómatíma prentverks á Íslandi, þá voru prentsmiðjur út um allt, prentaðar bækur út um allt land, en prentsmiðjurnar komu og fóru. Svanur Jóhannesson hefur safnað prentsmiðjueintökum svokölluðum og sett saman um þau bók og sýningu sem má sjá í bókasafninu í Hveragerði.
Í dagskrárliðnum Bækur og staðir förum við á Reykhóla og fræðumst meðal annars um Virkisvetur, sögulega skáldsögu Björns Th. Björnssonar.
Gagnrýnendur þáttarins fjalla um tvær bækur: Litlu dauðana eftir Stefán Mána og Manninn sem stal sjálfum sér eftir Gísla Pálsson.
Mikhail Shiskin er af mörgum talinn helsti núlifandi rithöfundur Rússlands. En hann býr núorðið í Sviss og er mjög gagnrýninn á stjórnarfar í ættlandinu.