Ég skrifaði um daginn um frönsku kvikmyndina La cicatrice interieure sem var tekin á Íslandi í kringum 1970. Hún telst vera gleymd Íslandskvikmynd.

Hér er önnur – sem er ekki jafn gleymd. Ekki alveg.

Þetta er ein mesta stórmynd sem Þjóðverjar höfðu ráðist í, Niflungasaga eða Die Niebelungen, og var sýnd í tveimur hlutum árið á sjöunda áratugnum.

Eins og sjá má í frétt í Tímanum 30. mars 1966 var þetta heilmikið fyrirtæki.

Myndin var frumsýnd í Þýskalandi fyrir jól 1966 og var líka jólamynd á Íslandi, hún var sýnd í Laugarásbíói annan í jólum 1966. Þá hefur hún verið glæný, það var sjaldgæft að svo nýjar myndir kæmu í bíóin hér á þessum árum. Á Íslandi hét myndin Sigurður Fáfnisbani. Í umfjöllun um hana þá segir að tökur hafi verið við Dyrhólaey, á Sólheimasandi, á Þingvöllum, við Gullfoss og Geysi og í Surtsey.

Út kom á Íslandi barnabók með litmyndum úr kvikmyndinni.

Hér eru brot úr myndinni þar sem má meðal annars sjá Dyrhólaey og Geysi.

Það er að segja af hinum vasklega Uwe Beyer sem lék Sigurð Fráfnisbana að hann var íþróttamaður, sleggjukastari. Hann vann til verðlauna á Ólympíuleikum. En hann var af kynslóð íþróttamanna sem fór að nota stera og dó af völdum þeirra, 48 ára að aldri.