Franska grínblaðið Charlie Hebdo birtir í nýjasta tölublaði sínu efni sem talið er munu reita íslamska bókstafstrúarmenn til reiði. Það þarf reyndar ekki mikið til. Útbreiðslumenn trúarinnar eru sífellt á höttunum eftir nýjum tilefnum til að móðgast.

Besta aðferðin til að mæta þessu er náttúrlega að slá öllu upp í grín – eins og Charlie Hebdo gerir. Grín afhjúpar hræsnara og ofstækismenn.

Við eigum okkar Hugleik Dagsson – honum er ekkert heilagt, sem betur fer.

Vandinn er reyndar sá að skrifstofur Charlie Hebdo urðu fyrir sprengjuárás í fyrra þegar kom út tölublað þar sem Múhammeð spámaður var kallaður gestaritstjóri. Sem betur fer meiddist enginn.

En þetta er forsíða nýja tölublaðsins. Þarna er heittrúar gyðingur að aka heittrúar múslima sem er í hjólastól, yfirskriftin er Hinir ósnertanlegu 2, en í talblöðrunni stendur:

„Það má ekki gera grín að okkur.“