Þegar örfáir dagar eru til þingkosninganna í Grikklandi, kosninga númer tvö á stuttum tíma, bendir flest til þess að hægriflokkurinn Nýtt lýðræði sé að auka fylgi sitt. Þetta er flokkurinn sem var við völd frá 2004-2009, á tímanum þegar kom í ljós að gríska hagkerfið var ósjálfbært.

Nú er eitt slagorð flokksins „drakman er dauði“ – flokkurinn varar við því að Grikkir gangi úr evrunni, hann vill í meginatriðum fylgja áætlunum ESB og AGS, þótt hann vilji endursemja um ýmis atriði.

Ef flokkurinn nær nægu fylgi er líklegt að hann reyni að mynda stjórn með PASOK, gömlu erkióvinum sínum úr flokki sósíalista, en fylgi þess flokks hrundi úr 44 prósentum í 15 prósent í kosningunum í síðasta mánuði. Evangelos Venizelos, formaður flokksins, hefur þó ekki breytt stefnu hans.

Sigurvegari kosninganna 6. maí var vinstri bandalagið Syriza sem fékk rúmlega sextán prósenta fylgi og leysti PASOK af sem næst stærsti flokkurinn. Kosningabaráttan í þetta sin hefur að miklu leyti snúist um formann flokksins Alexis Tsipras, sem er ungur, reffilegur og mælskur. En honum er legið á hálsi fyrir að setja fram óraunhæfar hugmyndir – einn flokksmanna hans gekk úr flokknum um daginn og sagði að Tsipras væri þjóðhættulegur lýðskrumari.

Allt bendir svo til þess að ný-nasistaflokkurinn Gullin dögun haldi sér inni á þingi. Það er verulegt áhyggjuefni, því hegðan flokksmanna hefur ekkert skánað þótt þeir séu komnir á þing. Frægt var þegar einn þingmaður flokk sins lamdi andmælanda sinn í beinni útsendingu í sjónvarpi – og undanfarið hafa flokksmenn hótað því að fara inn á barnaheimili og sjúkrastofnanir og bera þaðan út innflytjendur og börn þeirra.

Antonis Samaras, leiðtogi hins Evrópusinnaða hægri flokks Nea Demokratia. Tekst honum að mynda stjórn eftir kosningarnar á sunnudag?