Á bloggsíðu samtakanna Heimssýnar frá því í gær má lesa þetta:
„Vinstrihreyfingin grænt framboð sveik kjósendur sína og stefnuskrá með því að styðja ESB-umsókn Samfylkingar.
Svikin frá 16. júlí 2009 eru meiri og alvarlegri en nokkur stjórnmálaflokkur hefur leyft sér í seinni tíma stjórnmálasögu landsins.
Verkefnið í vetur er að minnka fylgi VG niður fyrir 5% þannig að flokkurinn falli af þingi í vor.“
Heimssýn er „þverpólitísk samtök sjálfstæðissinna í Evrópumálum“
Innan samtakanna hafa starfað ýmsir félagar úr VG. Vefurinn Smugan segir að meðal félaga hafi verið Jón Bjarnason, Ögmundur Jónasson og Steingrímur J. Sigfússon.
Rétt er þó að geta þess að innan stjórnar samtakanna er meira um brotthlaupna VG-ara, þar má nefna Ásmund Einar Daðason, Atla Gíslason og Bjarna Harðarson, fyrir utan Ragnar Arnalds – fáum liggur verra orð til VG en honum en hann kann þó enn að vera flokksfélagi.
