Það ekki ofmælt að Hanna Birna Kristjánsdóttir hafi unni stóran sigur í prófkjöri Sjálfstæðismanna í gær. Hún fær margfalt fleiri atkvæði en keppinautar hennar. Þetta bakar Bjarna Benediktssyni, formanni flokksins, ákveðin vandræði. Hann er með stjórnmálakonu sem er miklu vinsælli en hann sem næstráðanda í flokknum. Það ætti að vera formsatriði fyrir Hönnu Birnu að tryggja sér varaformannssætið, og þótt hún hafi tapað fyrir Bjarna á síðasta landsfundi virðist ljóst að hún skírskotar miklu meira til almennra kjósenda.

Þannig er óhjákvæmilegt að komi upp raddir um að hún taki við formennsku í flokknum fyrir kosningarnar í vor. Líklega verður þó að teljast að Bjarni fái að leiða flokkinn í gegnum kosningarnar, þær verða prófsteinninn á forystu hans.

Illugi Gunnarsson náði öðru sætinu – það þýðir að hann gæti fengið ráðherrasæti ef flokkurinn kemst í ríkisstjórn. Guðlaugur Þór Þórðarson dettur hins vegar niður listann – hann er út úr myndinni hvað það varðar.

Prófkjörið staðfestir hins vegar þróun sem hefur birst í öðrum prófkjörum undanfarið – áhugaleysi. 7456 greiddu nú atkvæði, það er 30 prósentum lakara en í síðasta prófkjöri fyrir hrun. Þátttakan var líka betri 2009 þegar flokkurinn var í sárum eftir hrunið, þá greiddu 7855 atkvæði.

Hið sama er upp á teningnum hjá öðrum flokkum og í öllum kjördæmum. Áhuginn á prófkjörunum er ekki mikill þótt stanslaust sé fjallað um þau í fjölmiðlum og skeytin gangi fram og til baka á Facebook.

En hvað Hönnu Birnu varðar þá er hún nú stigin út á vettvang landsmálanna. Hún hefur hingað til tjáð sig með mjög almennum orðum um pólitík. Nú verður uppi sú krafa að málflutningurinn verði nákvæmari – og að hún taki afstöðu til helstu álitamála.