Í kvæði eftir Borges er talað um saltvinda sem blási í íslensku myrkri.

Það er sannkallaður saltvindur í dag. Allar rúður eru útbíaðar í salti, bæði á húsum og bílum.

Maður veltir fyrir sér hvernig öllu glerinu í Hörpu reiðir af í þessu. Þegar engin er úrkoman og mikið rok að norðan hellist yfir okkur saltið.

Baggalútur gerir grín að því að hipsterar fjúki nú um bæinn. Það eru gestir tónlistarhátíðarinnar Iceland Airwaves.

Þeir fengu meiri loftbylgjur en þeir óskuðu eftir – maður sér þá hrekjast hérna milli húsanna. Þeir eiga líka á hættu að fá þakplötur í hausinn eða þaksteina sem fuku af Alþingishúsinu. Eða tré, það fauk niður stórt reynitré í garðinum hjá vini Kára – hann telur að hann sé „heppinn“.

Jú, kannski, það fauk tré í garðinum heima hjá mér á Ásvallagötu þegar ég var á þessum aldri, ég man enn hvað það var spennandi.

Ég held ég hafi aldrei sé Kollafjörðinn svona úfinn – en ég er svo mikill kjáni að ég fór gagngert niður á Sæbraut til að skoða, eftir að lögreglan hafði gefið út viðvörun um að fólk færi ekki þangað. Náði samt ekki svona glæsilegum myndum eins og fólk er að deila með sér á Facebook.

Leim tilraun til að taka mynd af óveðrinu við Sæbrautina. (Andartaki síðar fauk bíllinn út í buskann, en það náðist ekki á mynd.)