Tveir stórmerkilegir höfundar verða gestir í Kiljunni á miðvikudagskvöldið.
Annar er Einar Kárason. Í næstu viku kemur út eftir hann saga sem nefnist Skáld. Þetta er þriðja bókin í þríleik hans um Sturlungaöld, þær fyrri voru Óvinafagnaður og Ofsi, sú síðarnefnda hlaut Íslensku bókmenntaverðlaunin.
Við fórum með Einari út í Fagurey á Breiðafirði, en þar bjó Sturla Þórðarson, aðalpersóna bókarinnar, síðustu æviár sin.
Hinn gesturinn er Michel Houellebecq, hann er máski frægasti höfundurinn sem hefur komið í þáttinn frá upphafi. Út hafa komið þrjár skáldsögur eftir Houellebecq á íslensku í þýðingu Friðriks Rafnssonar, Öreindirnar, Áform og nú síðast Kortið og landið. Houellebecq hefur löngum haft lag á því að valda hneykslun – í viðtalinu ræðir hann meðal annars um uppgang Kínverja, sem er eitt þemað í síðustu bók hans, og þá ógn sem tjáningarfrelsinu stafar af trúarbrögðum.
Gagnrýnendur þáttarins fjalla um nýja skáldsögu eftir Eirík Örn Norðdahl, en hún nefnist Illska, og einnig spjöllum við aðeins um Vögguvísu eftir Elías Mar en hún er í brennidepli á Lestrarhátíð Bókmenntaborgar í Reykjavík. Vögguvísa hefur nýskeð verið endurútgefin.
Bragi Kristjónsson er svo á sínum stað – eins og endranær.
